Κύριε παντοκράτορ ὁ Θεός ἡμῶν, ἀγαθέ καί φιλάνθρωπε, ὁ εὐδοκήσας τήν ἀειπάρθενον Μαρίαν, ἐξ ἐπαγγελίας τεχθεῖσαν, ἐν τῷ ναῷ θαυμαστῶς ἀνατραφῆναι, καί εἰς κατοίκησιν τοῦ πρό αἰώνων ἐκ σοῦ ἀρρεύστως γεννηθέντος μονογενοῦς σου Υἱοῦ, ἑτοιμασθῆναι· ἧς ταῖς εὐπροσδέκτοις ἱκεσίαις, πρόσδεξαι, δεόμεθά σου, τάς προσευχάς καί ὑμνῳδίας ἡμῶν, ἅς ἐν τῇ εὐσήμῳ ἡμέρᾳ ταύτῃ τῆς ἐν τῷ ναῷ ἐνδόξου Εἰσόδου αὐτῆς εὐλαβῶς σοι προσφέρομεν· καί δώρησαι ἡμῖν χάριν, ἵνα ὥσπερ αὐτή ὑπό τῶν γονέων αὐτῆς ὡς ἄμωμος προσφορά εἰς τόν ναόν προσηνέχθη, οὕτω καί ἡμεῖς, καθαράς ἀπό συνειδήσεων πονηρῶν ἔχοντες καρδίας, καθ’ ἑκάστην παριστάμεθα ἐνώπιόν σου, ὅπως ταῖς μέν κακίαις νηπιάζοντες, τῇ δέ πίστει καί ἀρεταῖς ἀνδρίζοντες, καταξιωθῶμεν ἐλθεῖν εἰς τήν ἀγήρω ζωήν, καί τῆς ἀϊδίου μακαριότητος ἀπολαῦσαι. Ὅτι εὐλογητός εἶ εἰς τούς αἰῶνας τῶν αἰώνων. Ἀμήν.
Τῇ αὐτῇ ἡμέρᾳ ἑσπέρας
Κύριε Ἰησοῦ Χριστέ ὁ Θεός ἡμῶν, οἰκτίρμον καί ἐλεῆμον, ὁ τοῦ ἀνάρχου καί ἀϊδίου σου Πατρός συνάναρχος καί συναΐδιος Υἱός ὑπάρχων, ὁ καταξιώσας ἡμᾶς εἰρηνικῶς φθάσαι τήν ἡμέραν τῆς ἐν τῷ ναῷ Εἰσόδου τῆς παναχράντου σου Μητρός· ἧς ταῖς εὐπειθέσι μεσιτίαις δυσωπηθείς, εἰσάκουσον, ὡς ἀγαθός, τῆς προσευχῆς καί δεήσεως ἡμῶν, ἐξαιτούντων σωτηρίαν· καί ἐλευθερώσας ἡμᾶς ἐκ τῶν παγίδων τοῦ ἐχθροῦ, καί πάσης ἄλλης θλίψεως, παράσχου ἡμῖν εἰρήνην καί ὑγείαν τῆς τε ψυχῆς καί τοῦ νοός καί τοῦ σώματος, ἵνα εὐχαρίστως σε λατρεύωμεν, καί καθ’ ἑκάστην σέ προσκυνῶμεν πάσας τάς ἡμέρας τῆς ζωῆς ἡμῶν· ὅπως ἑκατέρωθεν εὐεκτοῦντες, καί τήν τερπνήν πανήγυριν ταύτην ἐτησίως ἑορτάζοντες, καταξιωθῶμεν τῷ ἐλέει σου, καί νῦν, καί ἐν τῷ μέλλοντι εὐαρεστῆσαί σοι, καί τῶν αἰωνίων ἀγαθῶν ἀπολαῦσαι. Ὅτι σοῦ ἐστιν ἡ βασιλεία, καί ἡ δύναμις καί ἡ δόξα εἰς τούς αἰῶνας τῶν αἰώνων. Ἀμήν.
ΠΗΓΗ: ΜΕΓΑ ΠΡΟΣΕΥΧΗΤΑΡΙΟΝ Α. ΣΙΜΩΝΩΦ. ΕΚΔΟΣΕΙΣ ΒΑΣ. ΡΗΓΟΠΟΥΛΟΥ. (Σελ.552).
Ἡ Εἰκόνα τοῦ κειμένου, ἔχει τεθεῖ ἀπό τόν συντάκτη τῆς ἀνάρτησης.
