Εὐχή πρωϊνή εἰς τήν Ὕψωσιν τοῦ Σταυροῦ.
Κύριε παντοκράτορ ὁ Θεός ἡμῶν, οἰκτίρμον καί ἐλεῆμων, ὁ τόν ἀγαπητόν σου Υἱόν, τόν Κύριον ἡμῶν Ἰησοῦν Χριστόν συγχωρήσας σταυρόν καί θάνατον ὑπέρ ἡμῶν τῶν κατακρίτων ἑκουσίως καθυπομεῖναι, ἵνα τῷ θανάτῳ αὐτοῦ τά τῆς σαρκός ἡμῶν πάθη νεκρώσῃ, καί τῇ ἀναστάσει αὐτοῦ νεκρωθέντας ἡμᾶς, τῇ παραβάσει τῶν ἐντολῶν σου, ζωοποιήσῃ, καί τῇ δυνάμει τοῦ σταυροῦ φωτίσας τούς ἐν σκότει πρός τό φῶς τῆς σῆς ἐπιγνώσεως ἑλκύσῃ. Δίδαξον ἡμᾶς, δεόμεθά σου, ἵνα, καθάπερ βλέπομεν τόν σταυρόν ὑψούμενον, οὕτω καί αὐτόν τόν σταυρωθέντα ἐν αὐτῷ ἐπιγινώσκοντες, πρός θεωρίας ὕψωσιν τῆς αὐτοῦ θεότητος ἀναγώμεθα· καί ἔργοις ἀγαθοῖς τόν βίον ἡμῶν κοσμοῦντες, καί τήν φαιδράν ἡμέραν ταύτην εὐλαβῶς τιμῶντες, καταξιωθῶμεν τῆς οὐρανῶν βασιλείας καί χαρᾶς ἀπολαῦσαι. Ὅτι εὐλογητός εἶ εἰς τούς αἰῶνας τῶν αἰώνων. Ἀμήν.
Τῇ αὐτῇ ἡμέρᾳ ἑσπέρας
Κύριε Ἰησοῦ Χριστέ ὁ Θεός ἡμῶν, ἀγαθέ καί φιλάνθρωπε, ὁ ἐπί τοῦ ξύλου τοῦ σταυροῦ τό ὑπέρ ἡμῶν ἑκούσιον θάνατον σαρκί καταδεξάμενος, ἵνα τούς διά τοῦ ξύλου θανατωθέντας, δι’ αὐτοῦ αὖθις ἐξαναστήσῃ. Αὐτός καί νῦν, Δέσποτα, οἴκτειρον ἡμᾶς, οὕς πάλαι τῷ τιμίῳ αἵματί σου ἐλυτρώσω, καί τῆς ἐπικειμένης ἡμῖν τυραννίας, οἷς τρόποις οἶδας, ῥυσάμενος, εἰς τήν πρώτην ἐλευθερίαν ἀποκατάστησον, ἵνα ἐν εἰρήνῃ τό ὑπόλοιπον τῆς ζωῆς ἡμῶν ζῶντες, εὐσεβῶς σε προσκυνῶμεν καί λατρεύωμεν, καί ἐν ψαλμοῖς καί ὕμνοις καί ᾠδαῖς πνευματικαῖς τήν πανσεβάσμιον Ὕψωσιν τοῦ Τιμίου σου Σταυροῦ ἐτησίως γεραίροντες, σέ τόν ἐν αὐτῷ ὑψωθέντα ἔχωμεν, νῦν μέν τήν τῶν πταισμάτων ἡμῶν ἄφεσιν εὐμενῶς χαριζόμενον, ἐν δέ τῷ μέλλοντι τῶν αἰωνίων ἀγαθῶν τήν ἀπόλαυσιν παρεχόμενον. Ὅτι εὐλογητός εἶ εἰς τούς αἰῶνας. Ἀμήν.
ΠΗΓΗ: ΜΕΓΑ ΠΡΟΣΕΥΧΗΤΑΡΙΟΝ Α. ΣΙΜΩΝΩΦ. ΕΚΔΟΣΕΙΣ ΒΑΣ. ΡΗΓΟΠΟΥΛΟΥ.
