Κύριε παντοκράτορ ὁ Θεός ἡμῶν, ἀκατάληπτε καί ἀνεξιχνίαστε, ὁ τῇ ἀρρήτῳ σου προμηθείᾳ εὐδοκήσας τόν ἐκλεκτόν σου δοῦλον Ἰωάννην θαυμαστῶς συλληφθῆναί τε καί γεννηθῆναι, εἰς τό ἑτοιμάσαι τήν ὁδόν τοῦ Χριστοῦ σου· οὗ ταῖς εὐπροσδέκτοις ὑπέρ ἡμῶν πρεσβεῖες, χάρισαι ἡμῖν, δεόμεθά σου, ἵνα, κατά τό κήρυγμα αὐτοῦ ἀληθῶς μετανοήσαντες, τήν ἁγίαν ζωήν αὐτοῦ μιμηθῶμεν, καί ὑπέρ τῆς ἀληθείας τοῦ ὑπ’ αὐτοῦ κηρυχθέντος καί βαπτισθέντος Σωτῆρος ἡμῶν εὐθύμως πάντα ὑπομένωμεν· ὅπως εὐσεβῶς ζῶντες, καί τήν μνήμην τῆς ἐνδόξου καί χαροποιοῦ γεννήσεως αὐτοῦ ἐτησίως πανηγυρίζοντες, καταξιωθῶμεν τῷ ἐλέει σου, μετά τήν ἀποβίωσιν ἡμῶν, τῆς πνευματικῆς ἐκείνης καί ἀλήκτου χαρᾶς ἐν τῇ ἡμέρᾳ τῆς δικαίας ἀνταποδόσεως σύν αὐτῷ ἀπολαῦσαι. Ὅτι εὐλογητός εἶ εἰς τούς αἰῶνας τῶν αἰώνων. Ἀμήν.
Τῇ αὐτῇ ἡμέρᾳ ἑσπέρας
Κύριε Ἰησοῦ Χριστέ ὁ Θεός ἡμῶν, Υἱέ καί Λόγε τοῦ Θεοῦ τοῦ ζῶντος, ὁ τήν παροῦσαν ἡμέραν τῇ τοῦ προδρόμου καί βαπτιστοῦ σου Ἰωάννου γεννήσει ἁγιάσας, καί ἐπίσημον ἡμῖν ἀναδείξας· οὗ ταῖς ἱκεσίαις πρόσδεξαι, δεόμεθά σου, τάς δεήσεις ἡμῶν καί ὑμνολογίας, ἅς εὐλαβῶς προσφέρομεν τῇ μεγαλειότητί σου· καί καθάπερ ἐχαροποίησας τούς γονεῖς αὐτοῦ, τοῦ μέν λύσας τήν σιωπήν, τῆς δέ τήν στείρωσιν, οὕτως εὔφρανον καί ἡμᾶς, διασκεδάσας τήν συμβαίνουσαν ἡμῖν οἱανδήποτε ἐκ τῆς ἁμαρτίας σκυθρωπότητα, ἵνα ἐν πνευματικῇ εὐφροσύνῃ τήν ἀεισέβαστον γέννησιν αὐτοῦ ἐτησίως ἐπιτελοῦντες, σέ εὐχαρίστως δοξάζωμεν· ὅπως διά τῶν προσκαίρων ἑορτῶν εἰς μνήμην ἀγόμενοι τῶν θαυμασίων τῆς παντοκρατορικῆς σου δυνάμεως, καταξιωθῶμεν τῷ ἐλέει σου τῶν αἰωνίων ἀγαθῶν ἐπιτυχεῖν. Ὅτι εὐλογητός εἶ εἰς τούς αἰῶνας. Ἀμήν.
ΠΗΓΗ: ΜΕΓΑ ΠΡΟΣΕΥΧΗΤΑΡΙΟΝ Α. ΣΙΜΩΝΩΦ. (Σελ. 574). ΕΚΔΟΣΕΙΣ ΒΑΣ. ΡΗΓΟΠΟΥΛΟΥ.
Ἡ Εἰκόνα τοῦ κειμένου, ἔχει τεθεῖ ἀπό τόν συντάκτη τῆς ἀνάρτησης.
