Κύριε παντοκράτορ ὁ Θεός ἡμῶν, εὔσπλαγχνε καί πολυέλεε, ὁ διά μείζονα βεβαίωσιν τῆς ἐκ νεκρῶν ἀναστάσεως τοῦ μονογενοῦς σου Υἱοῦ, Κυρίου δέ ἡμῶν Ἰησοῦ Χριστοῦ, τόν ἀπόστολον Θωμᾶν οἰκονομικῶς συγχωρήσας περί αὐτῆς διστάσαι· οὗ ταῖς μεσιτείαις δώρησαι ἡμῖν, δεόμεθά σου, πίστιν βεβαίαν, ἵνα ἀδιστάκτως πιστεύωμεν τήν τοῦ αὐτοῦ Σωτῆρος ἡμῶν διά Πνεύματος ἁγίου ἐκ τῆς ἀειπαρθένου Μαρίας ἀνέκφραστον σάρκωσιν, καί τήν ἄρρητον γέννησιν, τά ἐξαίσια θαύματα, καί ὑπερφυῆ ἔργα· τά ὑπέρ ἡμῶν φρικτά πάθη, καί τόν ἐν σαρκί ἑκούσιον θάνατον· τήν ζωοποιόν ταφήν, καί τήν ἐκ νεκρῶν ἀνάστασιν· τήν τε εἰς οὐρανούς ἀνάληψιν, καί τήν δευτέραν αὐτοῦ παρουσίαν· ὅπως ἔργοις ἀγαθοῖς, ζῶσαν τήν πίστιν ἔχοντες, καί τήν μνήμην αὐτοῦ ἑκουσίως τιμῶντες, καταξιωθῶμεν καί νῦν καί ἐν τῷ μέλλοντι εὐαρεστῆσαί σοι. Ὅτι εὐλογητός εἶ εἰς τούς αἰῶνας τῶν αἰώνων. Ἀμήν.
ΠΗΓΗ: ΜΕΓΑ ΠΡΟΣΕΥΧΗΤΑΡΙΟΝ Α. ΣΙΜΩΝΩΦ. ΕΚΔΟΣΕΙΣ ΒΑΣ. ΡΗΓΟΠΟΥΛΟΥ.
