Δόξα τῇ ἀπειροτάτῃ καί παναιτίῳ καί ζωαρχικῇ βασιλείᾳ σου, ἡ ὑπερούσιος καί ὑπέρθεος καί ὑπεράρχιος ἐναρχική Παναγία Τριάς, ἡνωμένως ἐν τρισίν ὑποστάσεσι διακεκριμένη, καί η ἕνωσις ὑπέρ νόησιν, ἡ πάντα ὑπέρ ἔννοιαν ὑπερβάλλουσα ἁγιότης· ἡ πάντων δεσπόζουσα κυριότης· η πάντων ὑπερκειμένη βασιλεία· ἡ πάντων ἀρχή ὑπεράρχιος, καί ἀπειρία πάσης ἀπειρίας καί πάντων πέρας ὑπερτελές· ἡ πάντα ἐν σεαυτῇ περιέχουσα κατά μίαν ὑπερουσίως ἀπειρίας ἁπλότητα.
Δόξα τῇ παναιτίῳ καί ζωαρχικῇ βασιλείᾳ σου· ἡ ὑπέρζωος καί ζωοποιός καί ἀϊδίως ὑπερεκβλύζουσα ζωαρχική καί ἁπλουστάτη ζωή· ἡ ἄφραστος καί ἀνείκαστος καί ἀνερμήνευτος ὑπεραστράπτουσα δόξα· ἡ μία καί ἁπλῆ καί ἀεί ὡσαύτως ἔχουσα καί ἐπί πάντα ἐκτεταμένη πηγαία δύναμις, ἀκωλύτως ἐπί πάντα χωροῦσα καί ἐνεργοῦσα μέχρι μερισμοῦ σαρκός καί πνεύματος, ἁρμῶν τε καί μυελῶν διικνουμένη, καί κριτική ἐνθυμήσεων καί ἐννοιῶν καρδίας.
Δόξα τῇ παναιτίῳ καί ζωαρχικῇ βασιλείᾳ σου! ἡ αὐτοϋπέρσοφος πηγαία καί ἀποπλυρωτική καί ὑπερπλήρης σοφία, ἡ μία τῶν ὅλων ἀγαθοποιός καί παναίτιος ὑπεροχικῶς ἐκπεφασμένη καί ἀφανής πρόνοια, ἡ ὑπέρ πᾶσαν ὑπερβαλλόντως ἀγαθότητα· ἀγαθαρχική πηγαία καί παναίτιος αὐτοϋπεράγαθος ἀγαθότης· ἡ ἑνοειδής καί ἀδιαίρετος ζωή καί δόξα καί δύναμις καί σοφία καί ἀγαθότης καί πρόνοια.
Δόξα τῇ παναιτίῳ καί ζωαρχικῇ βασιλείᾳ σου! ὁ Πατήρ, ἡ ῥίζα καί ἡ πηγή τῆς ὑπερουσίου θεότητος καί τῆς δόξης· ὁ πάσης ὁρατῆς καί ἀοράτου κτίσεως ποιητής· ἡ ἀναίτιος καί παναίτιος ἀρχή, ἀϊδίου γεννήτωρ Υἱοῦ, καί οὐσιωδῶς Πνεύματος ἁγίου πηγή.
Δόξα τῇ παναιτίῳ καί ζωαρχικῇ βασιλείᾳ σου! ὁ Κύριος ἡμῶν Ἰησοῦς Χριστός, ὁ ἐνυπόστατος Λόγος τοῦ Θεοῦ· ἡ ὑφεστῶσα σοφία καί δύναμις αὐτοῦ· δι’ οὗ τά πάντα ἐγένετο, τά ἐν τοῖς οὐρανοῖς καί τά ἐπί γῆς· τά αἰσθητά καί τά νοούμενα, εἴτε Χερουβίμ, εἴτε Σεραφίμ, εἴτε Θρόνοι, εἴτε Κυριότητες, εἴτε Δυνάμεις, εἴτε Ἐξουσίαι, εἴτε Ἀρχαί, εἴτε Ἀρχάγγελοι, εἴτε Ἄγγελοι. Εἰκών τοῦ ἀοράτου Πατρός, ἰσότιμος, συναΐδιος, ὁμοούσιος αὐτῷ, ταὐτοθελής, ταὐτοενεργής, ταὐτοδύναμος.
Δόξα τῇ παναιτίῳ καί ζωαρχικῇ βασιλείᾳ σου! τό Πανάγιον Πνεῦμα, τό Κύριον, τό θεοποιοῦν, τό ἐκ τοῦ Πατρός ἐκπορευόμενον καί ἐν τῷ Υἱῷ ἀναπαυόμενον, καί μεταλαμβανόμενον παρά πάσης τῆς κτίσεως· τό σῷζον, τό ἁγιάζον, τό ναοποιοῦν σεαυτῷ τούς ἀξίους τῆς σῆς σωτηριώδους ἐπιδημίας· δι’ οὗ πᾶσα φωτοποιός χάρις τοῖς ἀνθρώποις εκκέχυται καί πᾶσα πρόρρησις καί σοφία δεδώρηται.
Δόξα τῇ παναιτίῳ καί ζωαρχικῇ βασιλείᾳ σου! ἡ ἐν Τριάδι Μονάς, καί ἡ ἐν ἀλλήλαις τῶν θεαρχικῶν ὑποστάσεων ἀκίνητος ὕπαρξις· ὑλικῶς ὑπερηνωμένη, καί οὐδενί μέρει συγκεχυμένη· ἡ ἀνείδεος ἐν τοῖς εἴδεσι, ὡς ὑπέρ εἶδος οὖσα, καί ὑπερπλήρης ἐν τοῖς πλήρεσιν, ὡς ἀπεριόριστος· ὑπέρ τά ὁρώμενα, ὑπέρ τά ἀόρατα· ἄποσος, ἀπήλικος, ἀσύνθετος, ἀπερίληπτος, ἀΐδιος, ἄτρεπτος, ἄφθεγκτος, ἀπερινόητος.
Δόξα τῇ παναιτίῳ καί ζωαρχικῇ βασιλείᾳ σου! ἡ δημιουργοῦσα τά πάντα καί ζωοῦσα καί δυναμοῦσα καί τελεσιουργοῦσα καί συνέχουσα καί ἀνακαινίζουσα καί προμηθουμένη· ἡ πᾶσι τοῖς ἁγίοις σου ἑνιαίως τό θεουργόν φῶς μεταδιδοῦσα, καί ἀναλόγως ἐκλάμπουσα καί παρακαλοῦσα καί ενηδύνουσα· πάντων ὁρῶσα καθαρῶς τούς τῶν τελουμένων λόγους· ἐνθαρσοῦσά τε καί φαιδρύνουσα τούς ἐπί τήν σήν χρηστότητα νουνεχῶς ἀνατεινομένους.
Δόξα τῇ παναιτίῳ καί ζωαρχικῇ βασιλείᾳ σου, ἡ τῶν κινουμένων κατά τινα ἀνίερον σάλον ἵδρυσις ἱερά, καί τῶν ἑστηκότων ἀσφάλεια· ἡ τῶν ἀποπιπτόντων ἐκ τῆς ἰδίας περί τό καλόν ἐνεργείας ἀνάπλασις καί ἀνάστασις, τῶν δέ παραφθειρόντων τό κατά φύσιν ἀνακαινισμός καί ἀναμόρφωσις, καί τῶν ἐπ’ αὐτοῖς ἀναγομένων ὁδηγός καί ἀναστατική χειραγωγία· ὁ ἀπερίγραπτος καί υπερούσιος καί παντοκράτωρ τρισήλιος εἷς καί μόνος Θεός· ὁ πᾶσαν τήν τῶν ὄντων φύσιν διαμορφώσας· ὁ μόνος αἴτιος τοῦ εἶναι τά πάντα καί τό εὖ εἶναι ἔχειν· ὁ κρατῶν ἁπάντων τούς οἴακας καί ἄγων ὡς βούλει.
ΠΗΓΗ: ΜΕΓΑ ΠΡΟΣΕΥΧΗΤΑΡΙΟΝ Α. ΣΙΜΩΝΩΦ. ΕΚΔΟΣΕΙΣ ΒΑΣ. ΡΗΓΟΠΟΥΛΟΥ.
Ἡ Εἰκόνα τοῦ κειμένου, ἔχει τεθεῖ ἀπό τόν συντάκτη τῆς ἀνάρτησης.
