Δέσποτα Κύριε παντοκράτορ καί ποιητά τοῦ παντός, ὁ τῶν οἰκτιρμῶν Πατήρ καί τοῦ ἐλέους Θεός, ὁ ἐκ γῆς πλαστουργήσας τόν ἄνθρωπον καί ἀναδείξας αὐτόν κατ’ εἰκόνα σήν καί ὁμοίωσιν, ἵνα καί δι’ αὐτοῦ δοξάζηται τό πανάγιον ὄνομά σου ἐπί τῆς γῆς, δώρησαί μοι τῷ ἁμαρτωλῷ σῷ οἰκέτῃ ἐκ τοῦ θησαυροῦ τῆς σῆς εὐσπλαγχνίας ῥεῖθρον σοφίας καί γνώσεως, καί καταύγασόν μου τήν ἐζοφωμένην διάνοιαν τῷ παναγίῳ καί ἀγαθῷ καί ζωοποιῷ σου Πνεύματι, ἵνα βρύῃ διηνεκῶς ὥς περ πηγή ἡ χάρις σου ἐν καρδίᾳ καί στόματι ἐμοῦ τοῦ δούλου σου· ἵνα γένηται ἡ γλῶσσά μου ὡς κινύρα τῆς χάριτός σου, καί ἡ καρδία μου ναός ἄμωμος δεχόμενος Βασιλέα οὐράνιον· ἵνα μή ᾖ ὡς φωλεός τοῖς πονηροῖς λογισμοῖς καί σπήλαιον κακῶν λῃστῶν τῶν πονηρῶν ἐνθυμήσεων· ὅπως ἀπαύστως δοξάζω καί εὐλογῶ μετά πόθου σέ τόν ποιητήν μου ἐν καρδίᾳ καί στόματι πάσας τάς ἡμέρας τῆς ζωῆς μου· ὁ γάρ ὀκνῶν ὑμνολογεῖν καί δοξάζειν σε, τῆς μελλούσης δόξης οὐ τεύξεται. Ἐπεί οὖν ἐράσμιόν ἐστι τῇ ἐμῇ ψυχῇ τό κατά δύναμιν δοξολογεῖν καί αἰνεῖν τήν σήν ἀγαθότητα, φύλαξόν μου τόν νοῦν ἄτρεπτον, ἀπλανῆ, ἀπερίεργον. Τείχισόν μου τάς φρένας καί συντήρησόν μου τήν διάνοιαν, καί δός μοι χάριν ἐν ἀνοίξει τοῦ στόματός μου. Χάρισαί μοι σύνεσιν καί φωτισμόν καί δίδαξόν με πῶς δεῖ προσεύχεσθαι καί ὑμνεῖν σε, ὅτι τί προσέξασθαι καθό δεῖ, ἤ πῶς ὑμνῆσαί σε οὐκ οἶδα, εἰ μή σύ, Κύριε, ὁδηγήσῃς με τῷ Πνεύματί σου τῷ ἁγίῳ. Πρόσδεξαι τάς κατά δύναμίν μου δοξολογίας τε καί αἰνέσεις, τάς εὐχαριστίας, τάς εὐλογήσεις, τάς δεήσεις, καί ὅσα ἥμαρτον ἀπό νεότητός μου καί μέχρι τοῦ νῦν ἐν ἔργῳ ἤ ἐν λόγῳ ἤ κατά διάνοιαν, ἑκουσίως ἤ ἀκουσίως, ἄνες μοι, ἄφες, συγχώρησον. Ἐάν γάρ ἀνομίας παρατηρήσῃς, Κύριε, Κύριε, τίς ὑποστήσεται; ὅτι παρά σοί ἡ ἀπολύτρωσις· σύ γάρ εἶ μόνος ἅγιος, βοηθός κραταιός, ὑπερασπιστής τῆς ζωῆς ἡμῶν, ἐν σοί ἡ ὕμνησίς μου διά παντός, καί σέ εὐλογῶ καί δοξάζω χείλεσιν ἀναξίοις τόν Πατέρα καί Υἱόν καί τό Ἅγιον Πνεῦμα, τήν μίαν Θεότητα, τήν μίαν δύναμιν, τήν μίαν βασιλείαν, τόν ἕνα ἐν Τριάδι Θεόν, πάντοτε, νῦν καί ἀεί καί εἰς τούς αἰῶνας τῶν αἰώνων. Ἀμήν.
Πηγή: Μέγα Προσευχητάριον περιέχον Ἱερᾶς Προσευχάς ἐν πάσῃ περιστάσει καί ρήματα ἱερά (περί Προσευχῆς, Μετανοίας, Ἐξομολογήσεως, Μεταλήψεως, καί ἀναγνώσεως τῶν Θείων Γραφῶν), ὑπό ΑΝΔΡΕΟΥ Δ. ΣΙΜΩΝΩΦ. ΕΚΟΣΕΙΣ ΒΑΣ. ΡΗΓΟΠΟΥΛΟΥ. (Σελ. 153)
