Τοῦ ἐν ἁγίοις πατρός ἡμῶν Γρηγορίου ἀρχιεπισκόπου Θεσσαλονίκης τοῦ Παλαμᾶ
Κύριε ὁ Θεός ἡμῶν, ὁ ὑπάρχων πρό τῶν αἰώνων καί διαμένων εἰς τούς αἰῶνας, ὁ τοσοῦτον ὑπερβάλλων τῇ εὐσπλαγχνίᾳ, ὅσον καί τῷ τῆς δυνάμεως ἀπεριλήπτῳ, ὁ διά τούς ἀνεκδιηγήτους σου οἰκτιρμούς κλίνας οὐρανούς καί καταβάς ἐπί τήν γῆν καί διά τήν τῶν ἁμαρτωλῶν σωτηρίαν ἐνανθρωπήσας, ὁ τήν ἡμετέραν ἀπαθανατίσας ἥν προσελάβου φύσιν καί μετ’ αὐτῆς ἀνελθών ὅθεν καί κατῆλθες, ὡς ἄν ἐξ οὐρανῶν ὑπακούῃς ἵλεως τῶν ἐν συντετριμμένῃ καρδίᾳ βοώντων πρός σέ. Αὐτός, Δέσποτα τῶν ἁπάντων, κλῖνον τό οὖς σου, καί ἐπάκουσον ἡμῶν τῶν ἀναξίων δούλων σου, τῶν ἐμφραττομένων τό στόμα διά τό τῆς συνειδήσεως αὐτοκατάκριτον, τολμώντων δέ ὅμως τήν δέησιν. Ἴσμεν γάρ ἀναξίως πολιτευθέντες τῆς σῆς ὑπέρ ἡμῶν μέχρις ἡμῶν ἀπορρήτου κενώσεως καί τῶν μεγάλων ἔργων καί λόγων καί παθημάτων καί τῆς μέχρις ᾅδου συγκαταβάσεως καί τῆς ὑπερδεδοξασμένης ἐπανελεύσεως· ἀλλ’ οἴδαμέν σου καί τήν ἀήττητον φιλανθρωπίαν καί τήν ἀδαπάνητον ἀγαθότητα· διό καί προσρίπτομεν ἑαυτούς εἰς τό πέλαγος τῶν σῶν οἰκτιρμῶν καί ὀμολογοῦμεν τήν δεσποτείαν εἰ καί τῶν σῶν ἀλλοτριούμεθα προσταγμάτων διά τό πλῆθος τῶν πλημμελημάτων ἡμῶν· καί δεόμεθά σου, μή ἀποστρέψῃς τό πρόσωπόν σου ἀφ’ ἡμῶν, μηδ’ ἀπορρίψῃς ἡμᾶς ἀπό τοῦ προσώπου σου, μηδέ παραδῷς ἡμᾶς τοῖς καθ’ ἡμῶν μαινομένοις. Ἐπίβλεψον ἐφ’ ἡμᾶς εὐσπλάγχνῳ σου ὄμματι. Ἔπιδε συμπαθῶς ἐπί τήν ἡμετέραν ταπείνωσιν καί δεῖξον ἀνωτέρους τῶν τε ὁρατῶν καί ἀοράτων ἐχθρῶν, καί τῶν ἐπικειμένων καί προσδοκωμένων δεινῶν. Ἔνθες ἡμῖν δύναμιν ἐξ ὕψους· περιτείχισον ἡμᾶς τῇ σῇ παντοδυνάμῳ δεξιᾷ· φύλαξον ἡμᾶς ὑπό τήν σκέπην τῶν πτερύγων σου· κατοχύρωσον τῇ πρός ἀλλήλους ἀγάπῃ· καί εἰρήνην ἀστασίαστον δώρησαι. Πρός δέ πάντων καί ἐπί πᾶσι τόν σόν φόβον καί τήν σήν ἀγάπην ἐν ἡμῖν στήριξον, ἵνα καί ἐφ’ ἡμᾶς δοξασθῇ τό ὄνομά σου τό ἅγιον· ὅτι μόνῳ σοι κατελείφθημεν, καί πρός σέ μόνον βλέπομεν, καί ἐπί σοί μόνῳ πάσας τάς ἐλπίδας ἔχομεν, καί σοί τήν δόξαν ἀναπέμπομεν σύν τῷ ἀνάρχῳ σου Πατρί καί τῷ ζοωποιῷ Πνεύματι, νῦν καί ἀεί καί εἰς τούς αἰῶνας τῶν αἰώνων. Ἀμήν.
ΠΗΓΗ: ΜΕΓΑ ΠΡΟΣΕΥΧΗΤΑΡΙΟΝ Α. ΣΙΜΩΝΩΦ. ΕΚΔΟΣΕΙΣ ΒΑΣ. ΡΗΓΟΠΟΥΛΟΥ. (Σελ.414).
Ἡ Εἰκόνα τοῦ κειμένου, ἔχει τεθεῖ ἀπό τόν συντάκτη τῆς ἀνάρτησης.
