Εὐχή εἰς τόν ἅγιον ἀπόστολον καί εὐαγγελιστήν Λουκᾶν
Κύριε παντοκράτορ ὁ Θεός ἡμῶν, οἰκτίρμον καί ἐλεῆμων, ὁ τῇ ἐπιλάμψει τοῦ ἁγίου σου Πνεύματος τήν τοῦ ἁγίου ἀποστόλου Λουκᾶ καρδίαν καταυγάσας καί κήρυκα τοῦ Εὐαγγελίου τοῦ μονογενοῦς σου Υἱοῦ τοῦτον ποιήσας· δι’ οὗ πάντα τά ἔθνη τῷ τοῦ Λόγου αὐτοῦ ἀγκίστρῳ ὡς ἰχθῦας ἐκ τοῦ βυθοῦ τῆς ἀγνωσίας ζωγρήσας, πρός τό φῶς τῆς ἀληθείας ἀνήγαγες· οὗ ταῖς πρεσβείαις ῥίζωσον, δεόμεθά σου, ὅν ἔσπειρας δι’ αὐτοῦ ἐν ταῖς καρδίαις ἡμῶν θεῖόν σου Λόγον· καί στηρίξας ἡμᾶς ἐπί τήν πέτραν τῆς πίστεως, ποίησον, ἵνα τοῖς τοῦ ἁγίου κηρύγματος ὑγιεινοῖς δόγμασι τά τῶν ψυχῶν καί τῶν σωμάτων ἡμῶν νοσήματα θεραπεύωνται· ὅπως ἑκατέρωθεν εὐεκτοῦντες, εὐσεβῶς σέ λατρεύωμεν, καί τήν μνήμην αὐτοῦ ἐν ψαλμοῖς καί ὕμνοις καί ᾠδαῖς πνευματικαῖς ἐτησίως γεραίροντες, καταξιωθῶμεν τῷ ἐλέει σου τῶν τῆς ἀθανάτου ζωῆς αἰωνίων δωρεῶν ἀπολαῦσαι. Ὅτι εὐλογητός εἶ εἰς τούς αἰῶνας τῶν αἰώνων. Ἀμήν.
Τῇ αὐτῇ ἡμέρᾳ ἑσπέρας
Κύριε Ἰησοῦ Χριστέ ὁ Θεός ἡμῶν, ὁ τόν μακάριον ἀπόστολόν σου Λουκᾶν τόν ἰατρόν, οὗπερ ὁ ἔπαινος ἐν τῷ Εὐαγγελίῳ σου, εὐδοκήσας εὐαγγελιστήν καί κήρυκα τοῖς ἔθνεσι τῆς σῆς ἐνανθρωπήσεως γενέσθαι· δι’ οὗ τούς πιστεύσαντας τοῖς δόγμασί σου φωτίσας, καί τοῖς θαύμασι τά τῶν ψυχῶν καί σωμάτων αὐτῶν νοσήματα θεραπεύσας, πρός τήν σήν ἐπίγνωσιν ἐκάλεσας· οὗ ταῖς ἱκεσίαις πρόσδεξαι, δεόμεθά σου, τάς δεήσεις καί εὐχαριστίας ἡμῶν, ἅς ἐν τῇ εὐσήμῳ ἡμέρᾳ ταύτῃ πανηγυρικῶς σοι προσφέρομεν, καί ῥυσάμενος ἡμᾶς ἀπό πάσης θλίψεως, τήν ὁδόν ἡμῶν πρός σέ κατεύθυνον, τήν πίστιν στήριξον, τήν ἀγάπην κραταίωσον, καί τήν ἐλπίδα βεβαίωσον· ὅπως ἄν καί ἡμεῖς ἀξίως τοῦ ὀνόματός σου πολιτευόμενοι ἐν τῷ νῦν αἰώνι, καί τήν σεβάσμιον μνήμην αὐτοῦ ἐτησίως ἐπιτελοῦντες, καταξιωθῶμεν ἐν τῷ μέλλοντι τῶν αἰωνίων ἀγαθῶν ἀπολαῦσαι εἰς τούς αἰῶνας. Ἀμήν.
ΠΗΓΗ: ΜΕΓΑ ΠΡΟΣΕΥΧΗΤΑΡΙΟΝ Α. ΣΙΜΩΝΩΦ. ΕΚΔΟΣΕΙΣ ΒΑΣ. ΡΗΓΟΠΟΥΛΟΥ. (Σελ. 546).
Ἡ Εἰκόνα ἔχει τεθεῖ ἀπό τόν συντάκτη τῆς ἀνάρτησης.
