Ἁγίου Ἀναστασίου τοῦ Σιναΐτου Ἐπισκόπου Θεουπόλεως & Ἀντιοχείας
Βασιλείου.
Ἡ περικοπή αὕτη τοῦτο σαφηνίζει· περί γάρ τοῦ ἐλέγχοντος καί τοῦ ἐλεγχομένου ποιεῖται τόν λόγον. Ἐάν γάρ ὁ ἐλεγχθείς κατανυγῇ καί συνέλθῃ τῷ σκοπῷ τοῦ ἐλέγχοντος, περί παντός ἁμαρτήματος, οὗ ἐάν αἰτήσωνται τήν ἄφεσιν, δοθήσεται αὐτοῖς παρά τοῦ Θεοῦ. Εἰ δέ συμφωνήσῃ ὁ ἐλεγχόμενος τῷ μή ελέγχοντι, οὐκέτι ἄφεσις γίνεται, ἀλλά δεσμός κατά τό ἐπιφερόμενον· ὅτι, Ὅσα ἄν δήσητε ἐπί τῆς γῆς, ἔσται δεδεμένα ἐν τῷ Οὐρανῷ.
Τοῦ Χρυσοστομου ἐκ τοῦ κατά Ματθαῖον
Ἐάν φησιν, ἁμάρτῃ εἰς σέ ὁ ἀδελφός σου, ἔλεγξον αὐτόν μεταξύ σου καί αὐτοῦ μόνου· ἐάν σου ἀκούσῃ, ἐκέρδησας τόν ἀδελφόν σου· ἐάν δέ μή ἀκούσῃ, παράλαβε μετά σοῦ ἔτι ἕνα, ἤ δύο, ἵνα ἐπί στόματος δύο, ἤ τριῶν μαρτύρων σταθήσεται πᾶν ῥῆμα· ἐάν δέ καί αὐτῶν παρακούσῃ, εἰπέ τῇ Ἐκκλησίᾳ· ἐάν δέ καί τῆς Ἐκκλησίας παρακούσῃ, ἔστω σοι ὥσπερ ὁ ἐθνικός καί ὁ τελώνης. Ἀμήν, ἀμήν λέγω ὑμῖν, ὅσα ἄν δήσητε ἐπί τῆς γῆς, ἔσται δεδεμένα ἐν τῷ οὐρανῷ καί ὅσα ἄν λύσητε ἐπί τῆς γῆς, ἔσται λελυμένα ἐν τῷ οὐρανῷ. Ἐάν γάρ δύο συμφωνήσωσιν ἐπί τῆς γῆς περί παντός πράγματος, ὅσα ἄν αἰτήσωνται, γενήσεται αὐτοῖς παρά τοῦ Πατρός μου τοῦ ἐν Οὐρανοῖς. Οὐ περί τῶν προέδρων τοίνυν τῆς Ἐκκλησίας εἴρηκε τό, Ὅσα ἄν δήσητε ἔσται δεδεμένα, ἀλλά περί τοῦ προσκαλεσαμένου τόν ἁμαρτήσαντα πρός τό διαλλαγῆναι. Ὧ γάρ ἄν δήσῃ αὐτόν μή πειθόμενον, ἄλυτα μένει τά δεσμά καί ἐν τῇ ἐνταῦθα τιμωρίᾳ καί ἐν τῇ ἐκεῖ κολάσει καταδεσμῶν αὐτόν. Εἰκότως οὖν ἔλεγεν ὁ Ἀπόστολος. Μή ἐπιδυέτω ὁ Ἥλιος ἐπί τῷ παροργισμῷ ὑμῶν(²).
(¹) Ματ. 18.
(²) Πρός Ἐφεσ. 4.
ΠΗΓΗ: Βίβλος καλουμένη Ὁδηγός τοῦ ἐν Ἁγίοις Πατρός ἡμῶν Ἀναστασίου τοῦ Σιναΐτου Ἐπισκόπου Θεουπόλεως Ἀντιοχείας. Ἒκδοσις 3η ὑπό Γέροντος Χρύσανθου Σκουρτανιώτου Μοναχοῦ, τοῦ αὐταδέλφου αὐτοῦ Γερασίμου Ἱερομονάχου καί τῆς Συνοδείας αὐτοῦ. ΑΓΙΟΝ ΟΡΟΣ 1970 (Σελ. 126). Πρόλογος τοῦ ἐν Μοναχοῖς ἐλαχίστου Βίκτωρος Ματθαίου Καθηγουμένου τῆς ἐν Κρονίζῃ, Κουβαρᾶ Ἀττικῆς Ἱερᾶς καί σεβασμίας Δεσποτικῆς Μονῆς Μεταμορφώσεως του Σωτῆρος (10η Αὐγούστου 1970).
